തമിഴ്, തെലുങ്ക്, ഹിന്ദി ഭാഷകളില്‍ നിന്ന് റീമേക്ക് ഓഫര്‍ വന്നു, അതെന്നെ അതിശയിപ്പിച്ചു: രേഖാചിത്രത്തെ കുറിച്ച് ജോഫിന്‍ ടി ചാക്കോ
റിലീസ് ചെയ്തതിന് ശേഷം ചിത്രത്തിന് പ്രേക്ഷകരില്‍ നിന്നും മികച്ച പ്രതികരണങ്ങളാണ് ലഭിച്ചത്. അത് ബോക്‌സ് ഓഫീസിലും പ്രതിഫലിച്ചിരുന്നു. ചിത്രം ആഗോള തലത്തില്‍ 75 കോടിയാണ് നേടിയത്
ആസിഫ് അലിയെ കേന്ദ്ര കഥാപാത്രമാക്കി ജോഫിന്‍ ടി ചാക്കോ സംവിധാനം ചെയ്ത ചിത്രമാണ് രേഖാചിത്രം. ജനുവരി 9ന് തിയേറ്ററിലെത്തിയ ചിത്രം മലയാള സിനിമാ നൊസ്റ്റാള്‍ജിയയില്‍ വേരൂന്നിയ ഒരു സിനിമയാണ്. അതിനാല്‍ തന്നെ ഇത് മലയാളികളല്ലാത്ത പ്രേക്ഷകര്‍ക്ക് വര്‍ക്ക് ആകുമോ എന്ന സംശയം തനിക്കുണ്ടായിരുന്നുവെന്ന് ജോഫിന്‍ ടി ചാക്കോ. അതേസമയം ചിത്രത്തിന് തമിഴ്, തെലുങ്ക്, ഹിന്ദി ഭാഷകളില്‍ നിന്നുള്ള നിരവധി പ്രമുഖ ബാനറുകള്‍ റീമേക്ക് ഓഫറുകളുമായി തന്നെ സമീപിച്ചുവെന്നും ജോഫിന്‍ പറയുന്നു. രേഖാചിത്രത്തിന്റെ റീമേക്കുകളെക്കുറിച്ച് ചര്‍ച്ചകള്‍ നടക്കുകയാണെന്ന് സിനിമ എക്‌സ്‌പ്രെസ്സിന് നല്‍കിയ അഭിമുഖത്തില്‍ ജോഫിന്‍ ടി ചാക്കോ പറഞ്ഞു.
'എന്നെ അതിശയിപ്പിച്ചുകൊണ്ട് തമിഴ്, തെലുങ്ക്, ഹിന്ദി ഭാഷകളില്‍ നിന്നുള്ള നിരവധി പ്രമുഖ ബാനറുകള്‍ രേഖാചിത്രത്തിന്റെ റീമേക്ക് ഓഫറുകളുമായി എന്നെ സമീപിച്ചു. ഒരു പ്രമുഖ തമിഴ് നടനും റീമേക്കിനായി എന്നെ സമീപിച്ചു. ആ കഥയിലെ വെല്ലുവിളികളെക്കുറിച്ച് ഞാന്‍ ആശങ്ക പ്രകടിപ്പിച്ചപ്പോള്‍ റീമേക്ക് വേര്‍ഷനില്‍ ഉപയോഗിക്കാന്‍ പറ്റുന്ന ചില പഴയ സിനിമകളുടെ പേരുകള്‍ അവര്‍ നിര്‍ദ്ദേശിച്ചു. അതുകൊണ്ട് രേഖാചിത്രത്തിന്റെ റീമേക്കുകളെക്കുറിച്ച് ചര്‍ച്ചകള്‍ നടക്കുകയാണ്. പക്ഷേ ഞാന്‍ ആയിരിക്കില്ല അത് സംവിധാനം ചെയ്യുന്നത്', ജോഫിന്‍ ടി ചാക്കോ പറഞ്ഞു.
റിലീസ് ചെയ്തതിന് ശേഷം ചിത്രത്തിന് പ്രേക്ഷകരില്‍ നിന്നും മികച്ച പ്രതികരണങ്ങളാണ് ലഭിച്ചത്. അത് ബോക്‌സ് ഓഫീസിലും പ്രതിഫലിച്ചിരുന്നു. ചിത്രം ആഗോള തലത്തില്‍ 75 കോടിയാണ് നേടിയത്. കിഷ്‌കിന്ധാ കാണ്ഡത്തിന് ശേഷം ആസിഫ് അലിയുടെ കരിയറിലെ രണ്ടാമത്തെ 50 കോടി നേട്ടമാണ് രേഖാചിത്രം. കാവ്യ ഫിലിം കമ്പനി, ആന്‍ മെഗാ മീഡിയ എന്നീ ബാനറുകളില്‍ വേണു കുന്നപ്പിള്ളിയാണ് 'രേഖാചിത്രം' നിര്‍മിച്ചത്. ചുരുങ്ങിയ കാലയളവിനുള്ളില്‍ ഒരുപിടി നല്ല സിനിമകള്‍ നിര്‍മിച്ച് പ്രേക്ഷകശ്രദ്ധ പിടിച്ചുപറ്റിയിരിക്കുകയാണ് കാവ്യ ഫിലിം കമ്പനി. '2018'ന്റെയും 'മാളികപ്പുറം'ത്തിന്റെയും വന്‍ വിജയത്തിന് ശേഷം കാവ്യ ഫിലിം കമ്പനി, ആന്‍ മെഗാ മീഡിയ എന്നീ ബാനറുകളില്‍ വേണു കുന്നപ്പിള്ളി നിര്‍മിച്ച സിനിമയാണ് 'രേഖാചിത്രം'. വന്‍ തുകയ്ക്കാണ് ചിത്രത്തിന്റെ ഒടിടി, സാറ്റലൈറ്റ്, റീമേക്ക് ചര്‍ച്ചകള്‍ പുരോഗമിക്കുന്നത്.
അനശ്വര രാജന്‍, മനോജ് കെ ജയന്‍, ഇന്ദ്രന്‍സ്, ഹരിശ്രീ അശോകന്‍, ഭാമ അരുണ്‍, സിദ്ദിഖ്, ജഗദീഷ്, സായികുമാര്‍, ശ്രീകാന്ത് മുരളി, ഉണ്ണി ലാലു, നിഷാന്ത് സാഗര്‍, പ്രേം പ്രകാശ്, സുധി കോപ്പ,നന്ദു, വിജയ് മേനോന്‍, ഷാജു ശ്രീധര്‍, മേഘ തോമസ്, സെറിന്‍ ശിഹാബ്, സലീമ, പ്രിയങ്ക നായര്‍, പൗളി വില്‍സണ്‍ തുടങ്ങിയവരാണ് മറ്റ് അഭിനേതാക്കള്‍.
കലാസംവിധാനം: ഷാജി നടുവില്‍, സംഗീത സംവിധാനം: മുജീബ് മജീദ്, ഓഡിയോഗ്രഫി: ജയദേവന്‍ ചാക്കടത്ത്, ലൈന്‍ പ്രൊഡ്യൂസര്‍: ഗോപകുമാര്‍ ജി കെ, പ്രൊഡക്ഷന്‍ കണ്‍ട്രോളര്‍: ഷിബു ജി സുശീലന്‍, വസ്ത്രാലങ്കാരം: സമീറ സനീഷ്, മേക്കപ്പ്: റോണക്‌സ് സേവ്യര്‍, വിഫ്എക്സ്: മൈന്‍ഡ്സ്റ്റീന്‍ സ്റ്റുഡിയോസ്, വിഫ്എക്സ് സൂപ്പര്‍വൈസര്‍സ്: ആന്‍ഡ്രൂ ഡി ക്രൂസ്, വിശാഖ് ബാബു, കളറിസ്റ്റ്: ലിജു പ്രഭാകര്‍, കളറിംഗ് സ്റ്റുഡിയോ: രംഗ് റെയ്സ്, ചീഫ് അസോസിയേറ്റ് ഡയറക്ടര്‍: ബേബി പണിക്കര്‍, പ്രേംനാഥ്, പ്രൊഡക്ഷന്‍ കോര്‍ഡിനേറ്റര്‍: അഖില്‍ ശൈലജ ശശിധരന്‍, കാവ്യ ഫിലിം കമ്പനി മാനേജേഴ്സ്: ദിലീപ്, ചെറിയാച്ചന്‍ അക്കനത്, അസോസിയേറ്റ് ഡയറക്ടര്‍: ആസിഫ് കുറ്റിപ്പുറം, സംഘട്ടനം: ഫാന്റം പ്രദീപ്, സ്റ്റില്‍സ്: ബിജിത് ധര്‍മ്മടം, ഡിസൈന്‍: യെല്ലോടൂത്ത്, പി ആര്‍ ഒ & മാര്‍ക്കറ്റിംഗ്: വൈശാഖ് വടക്കേവീട്, ജിനു അനില്‍കുമാര്‍.
Popular
