ഗവ‍ർണറും ഡിഎംകെയും തമ്മിലുള്ള പോര് മൂ‍ർധന്യത്തിലെത്തിച്ചുകൊണ്ട് തമിഴ്നാട്ടിൽ നാടകീയ സംഭവ വികാസങ്ങൾ. ദേശീയ​ഗാനം ആലപിക്കാത്തതിൽ പ്രതിഷേധിച്ച് സഭാ സമ്മേളനത്തിൽ നിന്ന് ഗവ‍ർണ‍ർ ആർ.എൻ. രവി ഇറങ്ങിപ്പോയി. ദേശീയ​ഗാനത്തേയും ഭരണ​ഘടനയേയും ഡിഎംകെ സ‍ർക്കാർ അപമാനിച്ചെന്ന് രാജ്ഭവൻ വിമർശിച്ചു. ഇതിന് ഡിഎംകെ മറുപടി പറഞ്ഞു. അണ്ണാ സർവകലാശാലയിലെ ലൈംഗികപീഡന ആരോപണത്തിലും സഭയിൽ വലിയ പ്രതിഷേധമുണ്ടായി.

തമിഴ്നാട് സർക്കാരിന്റെ സംസ്ഥാന ​ഗാനമാണ് തമിഴ് തായ് വാഴ്ത്ത്. ഇതിലെ തമിഴ് തായ് വാഴ്ത്ത് എന്ന പ്രയോ​ഗം തമിഴ് മണ്ണിന്റെ മക്കൾവാദമാണെന്നും ദ്രാവിഡദേശം എന്ന പ്രയോ​ഗം വംശീയതയെ പ്രോത്സാഹിപ്പിക്കുന്നുവെന്നും മുൻപും ​ഗവർണർ ആർ.എൻ. രവി ഉന്നയിച്ച വിമർശനമാണ്. ​ഇത്തവണത്തെ വഴക്കിനും ഈ ഗാനം കാരണമായി. നിയമസഭാ സമ്മേളനത്തിലെ ആദ്യദിനമായ ഇന്ന് ​ഗവർണർ ആമുഖപ്രസംഗത്തിന് എത്തിയപ്പോൾ തമിഴ് ​ഗാനം ആദ്യം ഉയർന്നു. ദേശീയ​ഗാനം കൂടി ആലപിക്കാൻ ​ഗവർണർ ആവശ്യപ്പെട്ടു. സ്പീക്കറും മുഖ്യമന്ത്രിയും അടക്കമുള്ളവർ വഴങ്ങിയില്ല. ഇതോടെ ​ഗവർണർ ഇറങ്ങിപ്പോകുകയായിരുന്നു.

ALSO READ: ഇന്ത്യയിൽ HMPV കേസുകളുടെ എണ്ണം രണ്ടായി; സ്ഥിരീകരിച്ച് കർണാടക ആരോഗ്യ മന്ത്രാലയം

സഭയിലെ ആമുഖപ്രസം​ഗം ഒഴിവാക്കിയായിരുന്നു ആർ.എൻ. രവിയുടെ ഇറങ്ങിപ്പോക്ക്. ദേശീ​യ​ഗാനം ആലപിക്കാൻ സർക്കാർ വിസമ്മതിച്ചതിനാലാണ് സഭ വിട്ടതെന്ന് പിന്നീട് രാജ്ഭവൻ അറിയിച്ചു. ദേശീയ​ഗാനത്തേയും ഭരണ​ഘടനയേയും സംസ്ഥാന സർക്കാർ അപമാനിച്ചുവെന്നും ചട്ടങ്ങളെ കാറ്റിൽപ്പറത്തിയെന്നും ഇതിൽ നടുക്കം രേഖപ്പെടുത്തുന്നതായും രാജ്ഭവൻ എക്സിൽ കുറിച്ചു. ​

എന്നാൽ സഭാസമ്മേളന തുടക്കത്തിൽ സംസ്ഥാന​ഗാനവും സമാപനത്തിൽ ദേശീയ​ഗാനവും ആലപിക്കുന്നതാണ് തമിഴ്നാട് കീഴ്‌വഴക്കം. നേരത്തെയുള്ള രീതിയാണത്. എന്നാൽ ഗവർണർ അനാവശ്യ പ്രകോപനമുണ്ടാക്കുകയാണ് ചെയ്തതെന്ന് ഡിഎംകെ നേതാക്കൾ പറഞ്ഞു.

മറ്റ് വിഷയങ്ങളും സഭയിൽ വലിയ ബഹളമുണ്ടായി. അണ്ണാ യൂണിവേഴ്സിറ്റിയിലെ ലൈം​ഗികാതിക്രമ വിഷയത്തിൽ പ്രതിഷേധിച്ച് എഐഎഡിഎംകെ അം​ഗങ്ങൾ സഭയിൽ പ്രതിഷേധം സൃഷ്ടിച്ചു. 'യാര് അന്ത സാർ' എന്നെഴുതിയ പ്ലക്കാർഡുകൾ ഉയർത്തി പ്രതിയെ അറസ്റ്റ് ചെയ്യാത്തത് ഡിഎംകെ ​ഗൂഢാലോചനയെന്ന് പ്രതിപക്ഷം ആരോപിച്ചു.

ALSO READ: മാധ്യമ പ്രവർത്തകൻ മുകേഷ് ചന്ദ്രക്കറിൻ്റെ കൊലപാതകം: മുഖ്യപ്രതി പിടിയിൽ

സഭയിലെത്തിയ ​ഗവർണറെ ഡിഎംകെ അപമാനിച്ചുവെന്ന് വിമർശിച്ച് ബിജെപി അം​ഗങ്ങളും ഇറങ്ങിപ്പോയി. ഇതോടെ നാടകീയ സംഭവങ്ങളുടെ മണിക്കൂറായി മാറി തമിഴ്നാട് നിയമസഭയിലെ ആദ്യദിനം.

ഗവർ‌ണർ ആർ.എൻ. രവി പങ്കെടുത്ത പല പരിപാടികളിലും തമിഴ് ​ഗാനം ആലപിക്കുന്നതിലെ വിയോജിപ്പ് പ്രശ്നം സൃഷ്ടിച്ചിട്ടുണ്ട്. കഴിഞ്ഞ ഒക്ടോബറിൽ ചെന്നൈ ദൂരദർശൻ സംഘടിപ്പിച്ച പരിപാടിയിൽ തമിഴ് ഗാനത്തിലെ ചില വരികൾ വെട്ടിമാറ്റി അവതരിപ്പിക്കാൻ ഗവർണർ ആവശ്യപ്പെട്ടത് വലിയ വിവാദമായിരുന്നു. എംകെ സ്റ്റാലിൻ പങ്കെടുത്ത ഈ പരിപാടിയിൽ, ഗാനം ആലപിക്കുന്നതിൽ നിന്ന് ദ്രാവിഡത എന്ന പ്രയോഗമുള്ള വരികൾ എടുത്തുമാറ്റുകയായിരുന്നു. ഇത് വലിയ പ്രതിഷേധത്തിന് അന്ന് കാരണമായിരുന്നു.